http://www.dagsavisen.no/kultur/musikk/article412161.ece

For over fem år sidan stod publikumsfavoritten The Core fram som det nye stå på-bandet i norsk jazz. Med utvida mannskap og Vidar Johansens musikk er det duka for eit album i særklasse.

Utvidinga kjem frå Sverige, og med Nils Broo på trompet og Jonas Kullhammar på saksofon som ekstramannskap, går det nokre tankar til eit anna norsksvensk samarbeid av permanent merke, Atomic. Men den musikalske leten er ein annan, og bandet er spesialutvida for verket til den spelande komponist Johansen, «The Art Of No Return», med den mangslungne saksofonist og bassklarinettist også som sjuande mann på lasset.

Det er eit strålande verk og eit strålande album, i opptak frå to konsertar på den nasjonale jazzscena i januar. Det firedelte verket vart også framført på Vossa Jazz med Petter Wettre som stand in for den faste nye Core-saksofonisten Jørgen Mathisen. Og ettersom albumet er «vol. 1», må det vere meir i vente. Uansett framstår The Core, som i 2004 debuterte med albumet «Vision», som eitt av lukketreffa i serien norske jazzband med nerve. Legg til at Vidar Johansen også arrangerte og spela med dei og Bergen Big Band på «Meditations of Coltrane», med musikk bestilt til Nattjazzen i Bergen år 2007, og med til saman åtte album ruver The Core i det frodige norske jazzlandskapet i totusenårets første tiår.